HII NDIO E-CIGARETTE ,SIGARA YA KIELECTRONIKI ISIYOTUMIA TUMBAKU

Wakati dunia ikiendelea na vita dhidi ya uvutaji sigara, wanasayansi wa Chuo Kikuu cha Auckland, New Zealand, wamegundua teknolojia mpya ya sigara ya kieletroniki (E-cigarettes), ambayo
inawasaidia wavutaji kuacha na wengine kupunguza uvutaji kwa asilimia zaidi ya 50.

Chuo Kikuu cha Auckland kilichoanzishwa mwaka 1883, kinaheshimika kwa kutoa wanataaluma wenye weledi, kina wanafunzi kutoka zaidi ya nchi 90 na mwaka 2011 kilishika nafasi ya 82 ya vyuo bora duniani, kwa maana hiyo utafiti wake umekuwa hautiliwi shaka.

Kutokana na heshima yake kitaaluma, wanasayansi wa chuo hicho hivi karibuni wamefanikiwa kugundua kifaa kinachotumia betri, chenye nikotini ambayo siyo halisi, mtumiaji anapovuta sigara hiyo hupata faida ya kuacha au kupunguza kwa asilimia kubwa matumizi ya tumbaku.

Utafiti uliofanywa na wanasayansi wa chuo hicho umegundua kuwa, licha ya kuwepo plasta zilizo na nikotini (sumu iliyo kwenye tumbaku), kwa ajili ya kumsaidia mvutaji kuacha, teknolojia ya sigara ya kielektroniki imeonekana kukubalika kwa watumiaji wengi.

Vichwa vya wanasayansi vimekuwa vikiumia kila kukicha kusaidia jamii kuondokana na matumizi ya tumbaku yenye madhara kiafya kwenye mwili wa mwanadamu.

Mfano, takwimu za hivi karibuni za Shirika la Afya Duniani (WHO) zinaonyesha takribani watu milioni sita hufa kila mwaka kutokana na matumizi ya tumbaku na zaidi ya watu 600,000 hufa kutokana na kuvuta moshi wa mtu anayevuta.

Kumekuwapo na juhudi nyingi za kuhamasisha jamii kuacha kutumia tumbaku. Kwa mfano mwaka juzi Serikali ya Marekani ilitangaza kuzindua kampeni iliyogharimu dola 54 milioni kupitia matangazo ya kibiashara yaliyolenga kuelimisha umma madhara ya uvutaji sigara.

Taasisi ya Udhibiti wa Magonjwa ya Marekani (CDC), ndiyo iliyoratibu matangazo hayo ya kibiashara kwenye redio, televisheni na mitandao ya kijamii pamoja na mabango katika muda wa miezi mitatu.

Mfano wa tangazo mojawapo la kibiashara linaonyesha mwanamume wa miaka 31, ambaye amekatwa miguu yote miwili baada ya kupata ugonjwa unaoathiri damu, unaosababishwa na uvutaji sigara, lengo ni kuamsha uelewa wa watu kuhusu ubaya wa sigara.

Kugunduliwa kwa sigara hiyo ya kielektroniki huenda ukawa ni msaada mwingine kwa wanaotaka kuacha uvutaji wa sigara, lakini wanashindwa kwa hiari yao hadi wapate kichocheo cha kuwalazimu kufanya hivyo.www.pallangyo,blogspot.com

Sigara hiyo ya kielektroniki mwonekano wake ni kama sigara halisi na huibadili nikotini iliyowekwa ndani yake kuwa ya unyevunyevu, pale mtumiaji anapoivuta.

Wanasayansi hao bado hawajathibitisha kiwango cha madhara ya ndani ya nikotini iliyomo kwenye sigara hiyo, lakini imeelezwa kuwa na madhara kama sigara zingine halisi. CHANZO MWANANCHI NEWS PAPER TANZANIA by NOOR SHIJA